2026 жылғы 26 қарашада Астана қаласында Түркі мемлекеттері ұйымының (ТМҰ) Бас хатшысының орынбасары Мерей Мұқажан Түркі елдерінің сауда-өнеркәсіп палаталары Одағы (TCCI) жанындағы Іскер әйелдер кеңесінің Бас ассамблеясының 4-ші сессиясының ашылуына қатысып, сөз сөйледі.

Өз сөзінде Мерей Мұқажан әйел кәсіпкерлердің Түркі әлемінде тұрақты экономикалық дамуына, инновацияларға және аймақтық ықпалдастыққа қозғаушы күш ретінде қосатын елеулі үлесін атап өтті. Іскер әйелдер кеңесінің бизнес қауымдастықтары арасындағы ынтымақтастықты нығайту, стартаптар мен шағын және орта кәсіпорындарды қолдау, сондай-ақ, ТМҰ-ға мүше елдерде инклюзивті іскерлік орта қалыптастыру бағытындағы қызметтеріне жоғары баға берді. Мерей Мұқажан әйелдердің экономикалық құқықтары мен мүмкіндіктерін кеңейту ТМҰ қызметіндегі басым бағыттардың бірі екенін айта келе, әйелдердің сауда, инвестиция және цифрлық трансформация үдерістеріне белсене қатысуы өңірдің ортақ өркендеуі мен төзімділігін арттыруға елеулі үлес қосатынын жеткізді.

Бас ассамблеяның 4-ші сессиясына ТМҰ-ға мүше және бақылаушы елдерден жетекші әйел-кәсіпкерлер, бизнес көшбасшылар және бұл салаға қатысы бар  ұйымдардың өкілдері қатысып, түркі кеңістігіндегі өзара сауданы арттыру, табыс табу мәдениетін жақсарту және әйелдер басқаратын кәсіпорындар арасындағы өзара байланыстарды нығайтуға бағытталған практикалық шараларды талқылады.