Dünya Türk Dili Ailəsi Günü münasibətilə Türk Dünyası Gənclər və Elmi Forumu 15 dekabr 2025-ci il tarixində Daşkənd şəhərində keçirilib.
Forum Özbəkistan Respublikası Prezidentinin təşəbbüsü ilə yaradılmış Beynəlxalq Türk Dövlətləri Universiteti tərəfindən təşkil olunub. Tədbir dövlət qurumlarının nümayəndələrini, akademik dairələri və elmi müəssisələri, beyin mərkəzlərini, diplomatik korpusun üzvlərini və fəal gəncləri bir araya gətirərək 150-dən artıq iştirakçını toplayıb.
Forum çərçivəsində iki panel iclası təşkil edilib: “Dəyişən geosiyasi şəraitdə Türk dövlətlərinin davamlı inkişafı və strateji əməkdaşlığı” və “Türk mədəni kimliyinə və ortaq mənəvi məkana doğru: inteqrasiya prosesində Türk Dünyası gəncliyinin rolu”.
Çıxışında Türk Dövlətləri Təşkilatının (TDT) Baş katibinin müavini doktor Mirvohid Azimov Forumun Beynəlxalq Türk Dövlətləri Universitetində keçirilməsinin rəmzi əhəmiyyətini vurğulayıb. O, TDT çərçivəsində həyata keçirilən 30-dan artıq hərtərəfli əməkdaşlıq sahəsi arasında təhsil və gənclər məsələlərinin prioritet istiqamətlərdən biri olduğunu qeyd edib.
Baş katibin müavini, həmçinin 2024-cü ildə Bişkek Zirvə görüşündə dövlət başçıları tərəfindən qəbul edilmiş Türk Dünyası Xartiyasına toxunaraq, sənədin ortaq tarixi bağlar, dil birliyi və mədəni ahəng əsasında Türk dövlətləri arasında əməkdaşlığın daha da dərinləşdirilməsinə xidmət etdiyini bildirib.
Mirvohid Azimov TDT-nin üzv dövlətlərin potensiallarının reallaşdırılmasına, birgə səylərin əlaqələndirilməsinə və qlobal və regional çağırışlara kollektiv şəkildə cavab verilməsinə imkan yaradan səmərəli əməkdaşlıq platforması olaraq fəaliyyətini davam etdirəcəyini vurğulayıb.
Forum Türk sivilizasiyasının qlobal mədəni və intellektual məkandakı mühüm rolunu bir daha nümayiş etdirməklə yanaşı, Türk dünyasında davamlı inkişaf baxımından gənclərin fəal iştirakı və təhsil sahəsində əməkdaşlığın əhəmiyyətini ön plana çıxarıb.
Qeyd edək ki, 2025-ci ilin noyabr ayında Səmərqənd şəhərində keçirilmiş UNESCO-nun 43-cü Baş Konfransı çərçivəsində 15 dekabr tarixi rəsmi olaraq Dünya Türk Dili Ailəsi Günü elan olunaraq Türk dünyası üçün tarixi əhəmiyyət daşıyan bir mərhələ kimi qiymətləndirilib.
