15-dekabr kuni Vashingtonda "Heritage Foundation" tomonidan o‘tkazilgan “Markaziy Osiyodan Qora dengizgacha Turkiy dunyo kelajagi” mavzusidagi seminarda Turkiy davlatlar tashkiloti (TDT) Bosh kotibi, elchi, Kubanichbek O‘muraliyev nutq so‘zladi. 

Tadbir doirasida, AQShning yetakchi tahlil markazlari ekspertlari va tadqiqotchilari bilan fikr almashildi.

Bosh kotib TDTning tobora ortib borayotgan strategik ahamiyatini taʼkidlab, Tashkilot Markaziy Osiyodan Qora dengiz va Oʻrta yer dengizigacha choʻzilgan ulkan geografik hududdagi mamlakatlarni birlashtirgan toʻliq institutsionallashgan va natijalarga yoʻnaltirilgan hukumatlararo tashkilotga aylanganini bildirib o'tdi. U iqtisodiy rivojlanish, aloqadorlik, xavfsizlik va odamlarning o‘zaro hamkorligi yo‘nalishlaridagi yaqinlashuv tobora kuchayib borayotganini ham bildirdi.

Muzokaralar chog‘ida, ishtirokchilar AQSh siyosatchilari va tahlil markazlarining Turkiy mintaqaga qiziqishi ortib borayotgani hamda Turkiy diasporaning global muammolardagi roli tobora kuchayib borayotganini e'tirof qilib, Amerika tomonining tahlillari va siyosatiga baho berishda bu tendentsiya hisobga olinayotganini aytib o'tdilar.