2021-жылдын ноябрында Стамбул шаарында өткөн Түрк мамлекеттер уюмунун 8-саммитинде мамлекет башчылары табигый кырсыктардын кесепеттерин азайтуу жана калыбына келтирүүдө салым кошуу үчүн издөө, куткаруу жана реабилитация боюнча биргелешкен иш-чараларды жүргүзө турган «ТМУнун Жарандык коргоо механизми» аттуу өзгөчө кырдаалдарга жооп кайтаруу түзүмүн түзүү демилгесин көтөрүшкөн.

2022-жылдын декабрында Анкара шаарында өткөн ТМУнун Өзгөчө кырдаалдарды башкаруу боюнча министрлеринин биринчи жыйынында министрлер аталган Механизмди эң жакын убакта түзүү максатында ишти улантууга макулдашышкан.

2023-жылдын 16-мартында Анкара шаарында өткөн ТМУнун Өзгөчө саммитинде мамлекет башчылары ТМУнун Жарандык коргоо механизмин түзүү жөнүндө чечимге кол коюп, тиешелүү органдарга бул Механизмди түзүү боюнча макулдашууну бүтүрүү тапшырмасын беришкен.

2023-жылдын сентябрында Баку шаарында ТМУнун Өзгөчө кырдаалдарды башкаруу боюнча министрлеринин экинчи жыйыны өткөн. Анын алкагында «Баку-2023 Эл аралык машыгуусу» өткөрүлүп, анда ТМУнун Жарандык коргоо механизминин иши практикалык шартта байкалган.

2024-жылдын 6-ноябрында Бишкек шаарында ТМУнун Жарандык коргоо механизмин түзүү жөнүндө Макулдашууга кол коюлган.