2025-жылдын 28-ноябрында Баку шаарында Түрк мамлекеттер уюмунун (ТМУ) Медиа жана маалымат боюнча Министрлеринин жана Жогорку даражалуу расмий өкүлдөрүнүн 7-жыйыны өткөрүлдү.
Жыйынга Азербайжан Республикасынын Медианы өнүктүрүү Агенттигинин Аткаруучу директору Ахмет Исмайылов төрагалык кылды. Ошондой эле жыйынга Казакстан Республикасынын Маданият жана маалымат министринин орун басары Канат Искаков, Кыргыз Республикасынын Азербайжан Республикасындагы Элчиси Максат Мамытканов, Түркия Республикасынын Коммуникациялар Башкармалыгынын Төрагасынын орун басары Проф. Ферхат Пиринччи, Өзбекстан Республикасынын Президенттик Администрациясына караштуу Жалпыга маалымдоо каражаттары үчүн контент өндүрүү Борборунун директору Кобулжон Ахмедов, Түндүк Кипр Түрк Республикасынын (ТКТР) Тышкы иштер министри Тахсин Эртугрулоглу жана ТМУнун Башкы катчысынын орун басары доктор Өмер Кожаман катышты.
Башкы катчынын орун басары д-р Өмер Кожаман өз сөзүндө Азербайжандын түрк дүйнөсүндө кызматташтыкты чыңдоодогу негизги ролун баса белгилеп, маалыматтын глобалдык түшүнүктөрдү калыптандырууда стратегиялык элемент экенин айтты. ТМУнун алкагында медиа жана маалымат тармагында иштелип чыккан кызматташуу механизмдерине токтолгон доктор Кожаман, өткөн айда болуп өткөн Габала Саммитинин жыйынтыктары медиа кызматташтыгын илгерилетүү жана түрк дүйнөсүнүн глобалдык көрүнүктүүлүгүн жогорулатуу үчүн бекем негиз түзгөнүн билдирди.
Катышуучулар ошондой эле медиа кызматташтыгын өнүктүрүүгө багытталган биргелешкен аракеттердин, айрыкча учурдагы ТМУнун механизмдерин натыйжалуу пайдалануунун маанилүүлүгүн баса белгилешти.
Бир күн мурун, ТМУнун Медиа жана маалымат боюнча жумушчу тобунун 12-жыйыны өткөрүлүп, медиа жана маалымат боюнча министрлердин жана жогорку даражалуу расмий өкүлдөрдүн бекитүүсүнө коюла турган негизги документтер акыркы жолу такталды.
Жыйын мүчө мамлекеттердин ортосундагы кызматташтыкты чыңдоого багытталган конкреттүү максаттарды жана стратегияларды камтыган 2026-жылга карата ТМУнун Иш-аракет планын жана Баку Декларациясынын кабыл алынышы менен аяктады. Катышуучулар ошондой эле медиа жана маалымат боюнча министрлердин жана жогорку даражалуу расмий өкүлдөрдүн 8-жыйынынын 2026-жылы Казакстанда өткөрүлүшүн чечишти.
Жыйындын алкагында өткөрүлгөн Медиа Форуму глобалдык маалыматтык коркунучтар жана санариптик медиа кызматташтыгы боюнча панелдик талкууларды өткөрүп, тез өзгөрүп жаткан медиа экосистемасында мыкты тажрыйбаларды жана инновациялык ыкмаларды бөлүшүү үчүн аянтча түздү.
